Бостериде эс алуучунун өлүмү. Үч милиция кызматкери камакка алынды
Ысык-Көл облусунун Бостери айылында Талас облусунан келген эс алуучунун өлүмүнө байланыштуу атайын багыттагы полктун үч милиция кызматкери кармалды. Бул тууралуу Kaktus.media сайтына өздүк булактар билдирди.
Алардын айтымында, Бостери айылында 23 жаштагы жигитти сабап, кылмыш жасагандарды жашырууга аракет кылган атайын багыттагы полктун үч милиционери кармалган, алардын бири рота командири, экөө катардагы жоокер.
Соттун чечими менен алар Каракол шаарынын СИЗОсуна киргизилди.
Эске салсак, 5-августтан 6-августка караган түнү Ысык-Көлдө 23 жаштагы Бекболот Аманкулов каза болгон. Жигиттин сөөгү таңга жакын "Золотой пески" пансионатынын пляжынан табылган. Иликтөө иштеринин жүрүшүндө кылмышка шектүүлөр: Бишкек шаарынын 1991-жылы туулган тургуну Б.Б., ошондой эле Ысык-Көл облусунун тургундары Ж.Р. жана 1994-жылы туулган Э.А., жана 1995-жылы туулган А.У. кармалган.
