Дүкөндүн сатуучусу ур-токмокко алган кишини кечирди
Бишкектеги дүкөндөрдүн биринде белгисиз адам тарабынан сабалган сатуучу дооматынан баш тартты. Бул тууралуу Kaktus.media редакциясына укук коргоо кызматкерлери билдиришти.
Эске салсак, ушул жылдын 24-апрелинде саат 19:00 чамасында 6-кичи райондогу дүкөндөрдүн биринде белгисиз адам сатуучуну катуу сабап салган. Окуянын видеосу интернетке тарап, милиция тарабынан коь салган киши кармалган.
Шектүү 1968-жылы туулган орусиялык Г.А.Х. экени такталган. Ур-токмокко алуу боюнча кылмыш иши козголуп, тергөө материалдары Бишкектин Октябрь райондук сотуна өткөрүлгөн. Жабырлануучу дооматтарынан баш тартып, элдешкенине байланыштуу 3-июнда Кылмыш-жаза кодексинин "Бейбаштык" беренеси менен айыпталган Г.А.Х`га карата кылмыш иши токтотулган.
Ишти кыскартуу боюнча адвокаттын өтүнүчү канааттандырылган. Шектүүнүн баш коргоо чарасы эч жакка чыкпоо жөнүндө эскертүү түрүндөгү бөгөт чарасына алмаштырылып, токтом күчүнө киргенден кийин жокко чыгарылган.
