Садыр Жапаров профсоюздар федерациясынын жетекчилигин катуу сынга алды
Садыр Жапаров бүгүн, 10-сентябрда Ысык-Көл облусунун Ак-Суу районундагы "Жыргалаң" санаториясынын капиталдык оңдоп-түзөөдөн кийинки абалы менен таанышты. Бул тууралуу президенттик аппараттан кабарлашты.
Санаторий көп жылдар бою Профсоюздар федерациясынын балансында болуп, жараксыз абалга келип, 1995-жылы санаторийдин дарылоочу жайлары эскирип, талапка жооп бербей калган. Ошондон бери санаторий реконструкциядан жана модернизациядан өткөн эмес.
Бул жерде, санаторийдин аймагында президент Жогорку Кеңештин төрагасы Нурланбек Шакиевдин, министрлер кабинетинин төрагасы Акылбек Жапаровдун, министрлер кабинетинин мүчөлөрүнүн, парламенттик фракциялардын лидерлеринин, президенттик аппараттын өкүлдөрүнүн, профсоюздар федерациясынын катышуусунда көчмө жыйын өткөрдү.
Жыйындын жүрүшүндө президент Профсоюздар федерациясынын жетекчилигин балансындагы санаторий-курорттук жана туристтик жайларды натыйжасыз башкарып жаткандыгы үчүн катуу сынга алды. Садыр Жапаров 30 жыл ичинде Профсоюздар федерациясы санаториялык-курорттук жана туристтик объектилерди өнүктүрүү жана колдоо боюнча эч кандай олуттуу натыйжаларга жетише электигин баса белгиледи. Ал белгилегендей, бул объектилердин басымдуу көпчүлүгү эскирүү абалында, көбү сатылып кеткен, бул алардын инфраструктурасына жана тейлөө сапатына терс таасирин тийгизүүдө.
Профсоюздар федерациясына жыл сайын 600 миллион сомго жакын каражат бөлүнсө, акыркы 30 жылда жалпысынан 6,5 миллиард сомго жакын каражат бөлүнгөн. Мындан тышкары, 2021-жылга чейин балдар лагерлериндеги балдардын ден соолугун чыңдоого республикалык бюджеттен жыл сайын 5 миллион сом бөлүнөт.
Садыр Жапаров жаңыланган "Жыргалаң" пансионатын капиталдык реконструкциялоого жана курууга 150 миллион сомго жакын каражат жумшалганын, Профсоюздар федерациясы иштеген бардык жылдар ичинде бир дагы жаңы объект курулбаганын белгиледи. Бул убакыттын ичинде бул санаторийлерде кызмат көрсөтүүнүн сапаты жакшырган жок, тескерисинче, өтө төмөн деңгээлде. Иш берүүчүлөрдүн эсебинен жыл сайын чогултулган финансылык каражаттарга карабастан объектилердин абалы өтө начар.
Бардык кызматкерлердин санаторий-курорттук мекемелерде эс алууга мүмкүнчүлүгү болбогондугун айта кетүү керек. Профсоюздардын курорттук мекемелерине жолдомолорду бөлүштүрүүдө да коррупциялык схемалар орун алган.
Мамлекет башчы белгилегендей, профсоюздар федерациясынын мүлкү жана жер тилкелери мыйзамды айланып өтүп, үчүнчү жактарга сатылган, анткени профсоюздар жөнүндөгү мыйзамдарга ылайык, алардын мүлктөрүн сатууга болбойт. Жалпысынан алардын балансындагы 284 объектинин 134ү мыйзамсыз сатылган.Садыр Жапаров мындан ары бул жагдай көзөмөлгө алынарын баса белгиледи. Башкы прокуратурага жана Эсеп палатасына мыйзамсыз ээликтен ажыратылган объектилерди жана жер тилкелерин инвентаризациялоо жана мамлекеттин балансына кайтаруу боюнча иштерди баштоо тапшырылды.
Министрлер Кабинетине алардын профсоюздар федерациясы менен иштөө принциптерин карап чыгуу, санаториялык-курорттук жана туристтик жайларды заманбап, талаптагыдай формага келтирүү боюнча биргелешкен иш-чаралардын конкреттүү планын белгилөө, ошондой эле өнүмдөрдү бөлүштүрүү принцибин кайра карап чыгуу тапшырылды.
