Репрессияда атылгандар көмүлгөн жерди көрсөтүп берген Бүбүйра Кыдыралиева каза болду
Сталиндик репрессияда курман болгондор көмүлгөн жерди көрсөтүп берген Бүбүйра Кыдыралиева бүгүн, 14-августта 96 жашында дүйнөдөн кайтты.
Маалыматты Бүбүйра Кыдыралиеванын келини Аида Саитова Kaktus.kg редакциясына тастыктады.
Бүбүйра Кыдыралиева репрессия курмандыктарынын сөөгү жаткан жерди Кыдыралиева 1990-жылы ачыкка чыгарган. Ага бул жашыруун маалыматты өз кезегинде НКВДнын дачасында кароолчу болуп иштеген атасы Абыкан Кыдыралиев 1973-жылы айтып берген. Кыдыралиева укканын Совет доорунда ачык жарыялоого мүмкүн болгон эмес.
"Эл душманы" жарлыгы тагылып, 1938-жылы 5-7-8-ноябрь күндөрү атылгандардын арасында Төрөкул Айтматов, Иманалы Айдарбеков, Баялы Исакеев, Касым Тыныстанов баштаган интеллигенциянын 137 өкүлү болгон. Маркумдардын сөөгү 1991-жылы 30-августта жаңы негизделген "Ата Бейит" көрүстөнүнө арууланып кайра коюлган. Эртеси күнү Жогорку Кеңеш Кыргызстандын эгемендигин жарыялаган
.
Бүбүйра Кыдыралиева 1928-жылы 27-сентябрда Кыргыз АССРинин Чүй районундагы Воронцовка айылында туулган. Ленинград жогорку партиялык мектепти бүтүргөн. Ал Улуу Ата Мекендик согуш жылдарында тылдагы эмгектин ардагери.
Анын эскерүүлөрүнүн негизинде көмүлгөндөрдүн сыры ачылып, комплекстин андан кийинки ачылышы баяндалган "Чоң-Таштын сыры" китеби жарык көргөн. "Ата-Бейит" мемориалдык комплексинин аймагында музей бар, анын көргөзмөсүнүн бир бөлүгүндө башка нерселер менен катар Абыкановдордун үй-бүлөсүнүн жеке буюмдар камтылган.
