Таласта кой кайтарган видеосу тараган балага ИИМ белектерди тапшырды
Талас облусунун Шекер айылында кой кайтарган видеосу тараган балага Ички иштер министрлигинен белектер тапшырылды. ИИМдин маалымат кызматынан белгилешкендей, 10 жаштагы Бектурган келечекте милиция кызматкери болууну кыялданарын билдирген.
Бул тууралуу билген милиция кызматкерлери мектеп окуучусуна жагымдуу маанай тартуулап, белек берүүнү чечкен.
Ички иштер министринин атынан Бектурганга белектер тапшырылып, келечекте өз элине кызмат кылган татыктуу милиция кызматкери болууну каалашты.
Маданияттын эмгек сиңирген ишмери Ассоль Молдокматова баланын ата-энесин таап, алардын уруксаты менен Бектурганды шаарга алдырган. Молдокматова Бектурганга кийим-кече алып берип, дарыгерлерге көрсөтөрүн билдирген. Өз кезегинде Бектурган Бишкекте окугусу келгендигин айткан. Учурда ал Бишкек шаарындагы мектептердин бирине которулуп, билим алып жатканы белгилүү болду.
