Казакстанда абакта жаңжал чыгып, эки аскер, бир кызматкер жабыркады
Казакстандын түштүгүндөгү Түркстан облусундагы колониялардын биринде жаңжал чыгып, анын кесепетинен Улуттук гвардиянын эки жоокери жана мекеменин бир кызматкери жабыркаган.
Башкармалык соттолгондордун тобу "камакта кармоо режимине макул болбогондуктан баш ийбөөчүлүк көрсөтүшкөнүн" билдирди. Учурда колонияда абал турукташып калды, ал жакта Жаза-түзөтүү системасынын төрагасы, Улуттук гвардиянын кызматкерлери жана көзөмөл органдары бар.
Окуя Ленгер шаарындагы колонияда болгонун Orda.kz жазды. Анын айтымында, Жазык-аткаруу тутумунун бөлүм кызматкерлери тарабынан наркологиялык текшерүү жүргүзүлүп, бул соттолгондордун нааразычылыгын жаратып, алар электр трансформаторун өрттөшкөн. Жаңжалга 400дөй адам катышкан, ал эми колонияда жалпысынан 700дөй соттолуучу бар.
