Жогорку Соттун төрагалыгына болжолдуу талапкер айтылды
Жогорку Соттун азыркы судьясы Медербек Сатыев аталган органга төрага болушу. Бул тууралуу Kaktus.media редакциясына бир нече маалымат булактары билдирди.
Медербек Сатыев 2013-жылы бийликти күч менен басып алууга аракет кылган деп айыпталган ЖКнын депутаттары Садыр Жапаров, Камчыбек Ташиев жана Талант Мамытовду актаган Бишкек шаардык сотунун кылмыш иштери боюнча соттук коллегиясынын курамында болгон. Кийин Медербек Сатыев "кылмыш ишин кароодо Кыргыз Республикасынын Жазык-процесстик кодексин одоно бузгандыгы үчүн" кызматынан бошотулган.
2020-жылдын октябрында Кыргыз Республикасынын Президентинин аппарат жетекчисинин биринчи орун басары болуп дайындалган.
2021-жылдын июнь айынан 2022-жылдын сентябрына чейин президенттик аппараттын соттор жана прокуратура органдары менен өз ара аракеттенүү бөлүмүнүн башчысы болуп иштеген.
2023-жылы Кыргыз Республикасынын Жогорку Сотуна караштуу Сот департаментинин директору болуп иштеп, бирок өз каалоосу менен кызматынан бошотулуп, андан кийин Жогорку Соттун судьясы болгон.
2015-жылы "Республика - Ата Журт" партиясынан депутаттыкка ат салышкан (партиянын тизмесинде 43-орунда болчу).
Жогорку Соттун төрагалыгына дагы бир талапкер - Кыргыз Республикасынын Жогорку сотунун төрагасынын азыркы орун басары Шерали Камчыбеков экени айтылууда.
Шерали Камчыбеков 1999-2000-жылдары "Кыргызалко" мамлекеттик корпорациясында юрист болгон. 2003-2016-жылдары - Ош шаардык сотунун судьясы. 2017-жылдан баштап Жогорку Соттун судьясы. 2022-жылы Кыргыз Республикасынын Юстиция кеңешинин төрагасы болуп да шайланган. 2023-жылы Жогорку Соттун төрагасынын орун басары болгон.
Камчыбеков 2019-жылы Садыр Жапаровго карата жаза мөөнөтүн кыскартуу боюнча кылмыш ишин караган. Анда адвокат Бактыбек Асамудинов Жапаровдун абактагы мөөнөтүн 11 жыл 6 айдан мыйзамга ылайык эң жогорку мөөнөткө чейин кыскартуу өтүнүчү менен соттук коллегияга кайрылган.
Эскерте кетсек, Кыргыз Республикасынын Судьялар кеңеши 9-октябрдагы отурумунда Базарбековдун өз арызы боюнча ээлеген кызматынан бошотуу жана судьялык ыйгарым укуктарын мөөнөтүнөн мурда токтотуу жөнүндө арызын карап, жактырган.
10-октябрда Жогорку Соттун төрагасынын отставкасы Жогорку Кеңеш тарабынан кабыл алынган.
11-октябрда Садыр Жапаров Жогорку Соттун жетекчисин кызматтан алуу боюнча жарлыкка кол койду.
