Баткенде облустук ички иштер башкармалыгынын башчысынын орун басары Мухамадиев бычакталды
Баткенде облустук ички иштер башкармалыгынын башчысынын орун басары Аскарали Мухамадиев өлтүрүлдү. Мындай маалыматты Kaktus.media сайтына укук коргоо органдарындагы булактар билдирди.
Ал коомдук коопсуздукту камсыздоо маселелерин көзөмөлдөгөндүгү белгилүү. Мухамадиев милициянын подполковниги болгон.
Окуя кечээ, 26-мартта Баткен шаарындагы кафелердин биринде болгон. Азырынча тактала элек маалыматка ылайык, Мухамадиев бул мекемеде мурда соттолгон тууганы менен болгон. Алардын ортосунда чыр чыгып, натыйжада тууганы Мухамадиевге бир нече жолу бычак менен жаракат келтирген. Кан жоготуунун натыйжасында милициянын подполковниги каза болгон.
Кылмышка шектүү кылмыш болгон жерден качып кеткени айтылды. Учурда ал издөөдө жүргөндөрдүн тизмесинде.
Баткен облустук ички иштер башкармалыгынын басма сөз кызматы маалыматты тастыктаган жок. Алар Аскарали Мухамадиевге арнап некролог жарыялашты, бирок анын өлүмүнүн чоо-жайы такталган эмес.
