Тажикстандын куралдуу кол салуусунан жабыркагандардын дээрлик 19 млн сомдук насыясы жоюлду
Ушул жылдын 14-17-сентябрында Тажикстандын куралдуу агрессиясынан жабыркаган баткендиктердин 18 миллион 883 миң сом суммасына барабар болгон 268 насыясы жоюлду. Бул тууралуу Кыргызстандын Улуттук банкы билдирет.
Улуттук банк башкармасынын 2022-жылдын 6-октябрындагы "Баткен жана Ош облустарындагы куралдуу кагылышуунун натыйжасында жабыркаган коммерциялык банктардын, банк эмес жана адистештирилген финансы-кредит уюмдардын кардарларына колдоо көрсөтүү маселелери боюнча Улуттук банктын айрым чечимдери тууралуу" токтомунун талаптарынын аткарылышына мониторинг жүргүзүп турат.
"2022-жылдын 26-октябрына карата финансы-кредит уюмдарына 372 карыз алуучу кайрылган. 18 миллион 883 миң сом суммасына барабар болгон 268 кредит жоюлган, 20 миллион 885 миң сомго жеткен 64 кредит реструктуризацияланган", - деп айтылат маалыматта.
Азыркы тапта, финансы-кредит уюмдары жабыркаган карыз алуучулардан келип жаткан арыздардын бардыгын карап жатат жана банк мыйзамдарына ылайык тиешелүү чараларды көрөт.
