Өлкөдө чочко тумоосу менен 34 адам ооруп жатат
Кыргызстанда сасык тумоонун В түрү жана чочко тумоосу менен жабыркап жаткандар аныкталды. Ооруларды алдын алуу жана мамлекеттик санитардык-эпидемиологиялык көзөмөл департаментинен бүгүнкү күндө 34 адам ооруп жатканын айтышты.
Маалым болгондой, апта сайын курч респиратордук-вирустук инфекция жана сасык тумоо менен ооругандар боюнча мониторниг жүргүзүлөт. Ага ылайык, өткөн аптада ооругандардын саны өскөнү байкалды.
Адистер оору суук мезгилде күч аларын белгилешет. Алар белгилегендей, сасык тумоо А, В жана С деген түрлөргө боолүнөт. Анын ичинен А түрү оор формада өтөт.
Сасык тумоонун А түрү (H1N1) буга чейин чочко тумоосу деп аталган жана курч респиратордук инфекциялык оору деп эсептелет. Клиникалык белгилери мезгилдик сасык тумоого окшош. Негизги белгилери:
- дене тап жогорулайт;
- мурун бүтөт жана мурундан суу агат;
- тамак кызарып, бирдеме жутканда ооруйт;
- кургак жөтөл болот, көкүрөк туштагы оору менен коштолот;
- дене ооруйт;
- чарчоо, алсыроо;
- жүрөк бат-баттан согот (тахикардия);
- баш ооруйт (көбүнчө чеке бөлүгү ооруйт);
- көздүн чанактары ооруп, кызарат;
- шишип, өң кубарат;
- мурун канайт;
- көп уктоо же уйкусуздук болот.
