Жалал-Абадда милиция кызматкери пара алууга шектелип кармалды
Жалал-Абад облусунун Ноокен РИИБнин Кочкор-Ата шаардык милиция бөлүмүнүн кызматкери Э.Ш.К. 50 миң сом өлчөмүндө акча каражатын алып жаткан учурда кармалды. Бул тууралуу Улуттук коопсуздук боюнча мамлекеттик комитет билдирет.
Маалыматта айтылганда, ал Кочкор-Ата шаарынын тургунун кылмыш жоопкерчилигине тартуу менен коркутуп, маселени оң жагына чечип берүү үчүн акча каражатын талап кылган.
Бул факты боюнча УКМКнын Жалал-Абад облусу боюнча тергөө бөлүмү тарабынан КР Кылмыш-жаза кодексинин 343-берененин 1-бөлүмүндө ("опузалап пара талап кылуу") боюнча каралган кылмыштын негизинде кылмыш иши козголгон.
Кармалган адам УКМКнын Жалал-Абад облусу боюнча тергөө камак жайына киргизилди.
Учурда сотко чейинки өндүрүштүн алкагында тиешелүү иш-чаралар уланууда.
