"Үй-бүлөгө көмөк" жөлөк пулдун көлөмүн көбөйөтүү сунушталды
1-октябрдан тарта аз камсыз болгон үй-бүлөнүн балдары алчу жөлөк пулду көбөйтүү каралууда. Тиешелүү токтом долбоору коомдук талкууга чыгарылды.
Мыйзамга ылайык, муктаж болгон жарандарга ай сайын "үй-бүлөгө көмөк" жөлөк пул дайындалат. Жөлөк пулдун бул түрү аз камсыз болгон үй-бүлөлөрдүн балдарын оор турмуштук кырдаалдан чыкканга чейин убактылуу колдоо көрсөтүүгө багытталган.
Бүгүнкү күндө "үй-бүлөгө көмөк" жөлөк пулдун суммасы ар бир балага 1200 сомду түзөт. Калктуу конуштарда жашаган адамдарга райондук коэффициенттерди эске алуу менен төлөнөт.
2024-жылдын 1-сентябрына карата "үй-бүлөгө көмөк" жөлөк пулун алган балдардын саны 263 миң 136 (76 443 үй-бүлө) түзөт. Кыргыз Республикасын өнүктүрүүнүн улуттук программасына ылайык, жөлөк пулдун көлөмү көбөйүшү керек. Буга байланыштуу Эмгек, социалдык коргоо жана миграция министрлиги 2024-жылдын 1-октябрынан тарта жөлөк пулду 25% жогорулатууну сунуштоодо.
Бул токтом долбоорун октябрь-декабрь айларында ишке ашыруу үчүн 1347,4 миллион сомго жакын каражат керектелет, ал Эмгек, социалдык коргоо жана миграция министрлигинин бюджетинен каржыланат.
Кийинчерээк бул документ коомдук талкуудан алынды.
Башкы беттеги сүрөт иллюстрациялык.
